लहान कुटुंबामुळे मुलं एकटी पडत आहेत का ?

            कुटुंबव्यवस्था ही माणसाच्या जीवनात खूप महत्त्वाची भूमिका बजावत असते. कुटुंबामुळे आपल्या सामाजिक , आर्थिक , भावनिक गरजा पूर्ण होत असतात. लहान मुलांना कुटुंबामुळे सुरक्षितता लाभते. 

           आजच्या काळात एकत्रितकुटुंब विभक्त होत आहेत. नोकरी, वाद , आर्थिक या कारणानं कुटुंबातील लोक बाहेर राहू लागली आहेत. जो तो आपल्याच विश्वात गुंग आहे. आपलं काम आणि आपण मग कोण काय करतय याच कुणाला काही पडलं नाही. 

           एकत्रित कुटुंबामुळे सर्वांची भावनिक गरज पूर्ण होत होती. आजी, आजोबा, काका, काकी या सर्वांचा वावर कुटुंबात होत असायचा. कोणाला काही मदत लागली तर ती केली जात होती. लहान मुलांच्या मनात एकमेकां बद्दल प्रेम वाढत होते. आजी , आजोबांचा सहवास त्यांना लाभत होता त्यातून मुलं हळू हळू घडत होती. जबाबदारीची जाणीव त्यांना कुटुंबातच होत होती. इतरांशी कस वागायचं कसं बोलायचं याचं भान त्यांना होत. त्यासाठी काही विशेष शिकवण्याची गरज नव्हती. 

           मुलाचं भावनिक विश्व यामुळे समृद्ध होत होत. आजीच्या गोष्टी आणि आजोबा याच्या अनुभवातील प्रसंग यांचा मुलांच्या मनावर चांगला परिणाम होत होता. एकत्रित कुटुंबात सतत कोणी ना कोणी घरी असत होत त्या मुळे एकटेपणाची भावना म्हणजे काय ते मुलांना माहीत न्हवते. आपल्याबरोबर दुसऱ्यांचा विचार करायला मुलं आपोआप शिकत होती. जे काही असेल ते इतरांना देत होती.

            पण जस जशी कुटुंब लहान होत गेली तसं तसं मुलांचं भावविश्व कोमेजून जायला लागलं. घरात माणसं कमी झाली. आई वडील कामात गुंतले त्यामुळे त्यांना मुलांकडे लक्ष द्यायला वेळ मिळेना. आजी आजोबा नसल्याने गाणी गोष्टी सांगायला कोणी उरलं नाही. मुलांशी संवाद कमी झाला. कुटुंबच छोट झालं त्यामुळे इतरांचा सहवास कमी झाला. भावनिक गरजा पूर्ण होण्यात अडचणी येऊ लागल्या. भाऊ बहीणी ज्या मोठया कुटुंबात त्यांच्याशी खेळण्यासाठी सहज उपलब्ध होत होती ती आता राहिली नाहीत. मुलं एकटी पडू लागली. 

          मुलांचा मोबाईलचा वापर वाढू लागला. आई वडील कामात असल्याने त्यांना मुलांसाठी वेळ देता येत नसल्याने त्यांनी त्यांना मोबाईल दिला आणि मुलं त्यामध्ये अडकून पडली. ती अधिकाधिक एकटी पडू लागली. 

          लहान कुटुंबात मुलांच्या भावनिक गरजा पूर्ण होण्यात अडचणी येत आहेत. एकटेपणात वाढ होत आहे. मुलं एकलकोंडी होऊ लागली आहेत. त्यांना वेळ देणं गरजेचं आहे. मोबाईल, टीव्ही, गेम च्या आर्टिफिशिल जगातून त्यांना बाहेर काढून वास्तविक जगात आणण्यासाठी प्रयत्न करणं गरजेच आहे.